Vandag se boodskap is op ’n olieverfskildery verbeeld deur die bekende skilder Harry Erasmus. Ons ontvang die skildery met nederige dankbaarheid Harry!
‘ARROWS OF HOPE’ SKILDERY
Simboliese waarde:
Slang (Leviathan) en demone..ons daaglikse aanvalle en probleme.
Figuur: die mens.
Boog en pyl: hoop
Ketting: gebonde.
Insig:
• Die mens is onder die bloed van Jesus(rooi op figuur).
• Ons het tot ons beskikking pyle van hoop (fondasie vir geloof)
• Die ketting hou ons gebonde om totaal vry te wees deurdat ons ons ons laat aflei deur wêreldse dinge soos wat deur die slang uitgebeeld word.
• Hy wil verwoes en nie toelaat dat ons pyl die teiken tref nie.
Geheelbeeld:
• Ons fokus so op ons wêreldse probleme dat ons nie die Lig opmerk wat deur die tralies skyn nie(Lig van God)
• Ons vergeet dat ons onder die Bloed is en dat ons pyle van hoop het.
• Ons maak van onsself gevangenes
• Die ‘bottom line’ is dat ons hoop het – ons moet leer om dit te gebruik.
• Aanvalle is sodat ons in ons geloof kan groei.
• Kyk na uitbeelding en sien hoop. Ons het pyle van hoop en ons is beskerm deur Sy Bloed.
Harry Erasmus – Skilder
In een toneel van die gewilde film Robin Hood, The Prince of Thieves, kom Kevin Costner as Robin na ‘n jong man wat met sy pyl en boog teiken skiet. Robin vra vir die jong man, “Sal jy raak kan skiet as jou aandag afgetrek word?”
Net voordat die seun die pyl losgelaat het, het Robin sy oor met die vere van ‘n pyl gekielie. Die seun se skoot was heeltemal bo die teiken. Nadat die gelag van die toeskouers bedaar het, het Maid Marian, wat agter die seun gestaan het, vir Robin gevra, “Kan jy?”
Robin Hood het sy boog gelig en gemik. Net toe hy die pyl los, het Maid Marian teen hom kom staan en verleidelik in sy gesig geblaas. Die pyl het die teiken gemis, van die boom daaragter weggeskram en ‘n omstander net-net gemis.
Ons aandag word op dieselfde wyse op allerlei maniere afgetrek wanneer ons met die pyle van ons geloof op die Goliatte van die lewe mik, en of dit nou pynlik of aangenaam is, die resultaat bly dieselfde: sonder hoop in God se getrouheid, mis ons elke keer die teiken.
Ek glo dat dit tyd geword het vir ons om te praat oor hoop – hoop wanneer ons neerslagtig voel; hoop wanneer ons omstandighede nie goed lyk nie en hoop wanneer ons oor die toekoms dink.
Ons Skrifgedeelte kom daarom van iemand wat ook terneergedruk gevoel het en dan homself weer optel met net drie woorde:
Psa 42:6 Wat buig jy jou neer, o my siel, en is onrustig in my? Hoop op God…!
Drie Goliatte wat ons aanval
Elkeen van ons het al seisoene beleef waar dit vir jou gevoel het of die mat onder jou uitgeruk is. Jy word onverwags afbetaal, iemand naby jou sterf, jy ontvang slegte nuus oor jou gesondheid of of jy kry kennis dat jy al weer moet trek en jou keel trek net daar toe want jy wonder dadelik of jy gaan sukkel om jou deposito terug te kry. Dit is veral oor die laaste 14 maande dat baie van ons se omstandighede oënskynlik onherroeplik verander het. Vandag gaan ons kortliks fokus op drie Goliatte wat ons aanval en ons hoop steel:
Ons onmiddelike omstandighede
Die Goliat van Omstandighede neem die NOU oomblikke weg uit jou lewe. Indien die aanval lank genoeg aanhou, begin jy ophou lewe, jy bestaan net. Jou lewe word een lang siklus van opstaan-werk-eet-slaap. Jy is altyd moeg en al is jy lus vir ’n uit-eet, visvang of kamp of ‘kom-ons-kom-net-bietjie-uit’, het jy eenvoudig nie die energie nie. Wanneer dit slaaptyd word en jy in die bed klim, is jy bly dat jy nog ’n dag kon oorleef.
Kenmerke van so ’n aanval is:
- Dit veroorsaak angs of kommer;
- Dit kan kort- of langtermyn wees;
- Ons beskou dit gewoonlik as buite ons hanteringsvermoë;
- Dit verminder prestasie en
- Dit kan tot geestelike en fisiese probleme lei.
Wanneer ons probeer om terug te baklei teen hierdie Goliatte, sal hy ons aandag probeer aftrek, net soos wat Robin Hood die seun se oor gekielie het toe hy mik, sodat ons pyle die merk mis. Na ’n paar keer se probeer voel dit dan vir ons of ons geloof nie werk nie of dat ons iets verkeerd doen of gedoen het.
Vrees vir die Toekoms
Die tweede Goliat waaroor ek vandag wil praat, is Vrees vir die Toekoms of Antisiperende Angs. Niemand weet wat die toekoms inhou nie, dus is dit redelik normaal om te wonder hoe ons werk- of verhoudingsituasies gaan uitloop. Sommige van ons is ook meer besorg oor minder gewone gebeurtenisse, soos natuurrampe, die verlies van ons geliefdes of wêreldwye pandemies soos die huidige Covid 19 Pandemie.
Vrees vir die Toekoms is ’n oorheersende vrees en bekommernis oor slegte dinge wat moontlik kan gebeur. Dit kan in baie verskillende kontekste gebeur, maar dit fokus gewoonlik op dinge wat jy nie kan voorspel of beheer nie. Weereens is dit normaal om jouself soms te bekommer oor die toekoms, maar as dit jou daaglikse lewenskwaliteit begin beïnvloed sal dit jou laat sukkel om op die Here te vertrou.
Vrees vir die Toekoms of Antisiperende Angs kan wissel vanaf ’n tydelike senuweeagtigheid tot ‘n donker, aftakelende gevoel van vrees.
Kenmerke van so ’n aanval is
- Konsentrasieprobleme;
- Probleme met jou emosies en buierigheid;
- Verlies aan belangstelling in jou stokperdjies;
- Rusteloosheid;
- Naarheid en eetlusverlies en
- Slaapprobleme
Vrees vir die Toekoms kan ook maak dat jy baie tyd spandeer om jouself die ergste scenario’s voor te stel. As jy te veel fokus op negatiewe uitkomste, sal dit beslis jou frustrasie en gevoel van hopeloosheid verhoog.
Sê nou maar jou maat lyk die laaste tyd ‘n bietjie afsydig. As jy dit noem, sê hy of sy niks is verkeerd nie. Jy glo hom of haar nie en begin bekommerd wees dat hy of sy wil opbreek, en nou kan jy nie ophou om te dink aan wat jy glo aan die kom is nie. As jy weer sien, voel jy siek en het jy probleme om normaal te eet en te slaap.
Vrees vir Tekort
Die laaste Goliat waaroor ek wil praat, is die Vrees vir Tekort. Sal ek my verband hierdie maand kan betaal? Sal ek binne ‘n paar maande op daardie reis kan gaan wat ons beplan? Wat as my motor breek en ek nie die herstelwerk kan bekostig nie? Sê nou ek raak uit tyd uit en mis die sperdatum? Wat as daardie kliënt nooit weer met my wil saamwerk nie? Klink dit bekend?
Kenmerke van ’n aanval van ’n Vrees vir Tekort kan die volgende insluit:
- Angs rondom aankope of uitgawes – veral onverwagte of onnodige uitgawes;
- Paniekaankope soos wat ons tydens die begin van die Covid 19 pandemie beleef het;
- Bekommernis oor finansies of hoe jy dinge sal doen as jy jou inkomste verloor;
- ‘n Onvermoë om die dinge wat jy het, te geniet, want jy is gefokus op wat jy nie het nie.
- Jaloerse gevoelens teenoor vriende of kollegas as hulle iets kry wat jy nie het nie en
- Om deurentyd met jouself mee te ding en jou met ander te vergelyk en dan hard op jouself te wees as jy nie suksesvol is nie.
’n Ingesteldheid op Tekort is ‘n voortdurende gevoel van nie-genoegsaamheid. Jy sukkel met gevoelens van ontoereikendheid, vrees om sonder iets te gaan en ‘n gebrek aan selfvertroue wat meestal spruit uit negatiewe denkpatrone rondom tyd, geld en energie.
Om ‘n Vrees vir Tekort te hê, het min te doen met wat jy in jou bankrekening het, of hoeveel tyd of energie jy op ‘n dag moet gee; en baie te doen met hoe ons oor onsself voel en wat ons glo oor wat ons kan bied aan hierdie wêreld.
Jy kan vir ’n honderd keer oor gesê word: “God sal voorsien!” maar as jy konstant finansieel sukkel en nie ‘n goeie rede het om jouself te vertel oor waarom jy finansieel sukkel nie, is dit maklik vir jou onderbewussyn om te begin glo dat ‘God voorsien — net nie vir my nie’.
Maniere hoe ons aandag afgetrek word sodat ons die teiken mis
Ons vyand, die duiwel, gebruik verskeie maniere om ons aandag af te trek sodat ons die teiken mis wanneer ons die Goliatte in ons lewens probeer oorwin. Sommige van sy strategieë is –
- Besige skedules (te besig om te bid of Bybel te lees)
- Oorwerk en konstant moeg
- Bekommernis en angs
- Herhalende en ongesonde gedagtepatrone
- Oordrewe strewe na perfektheid.
Bybelse Hoop
Ek is nietemin die draer van Goeie Nuus vandag! Nieteenstaande ons vyand se (oorwegend suksesvolle) aanslae teen ons, is daar tog iets wat ons kan doen aan ons omstandighede. Ek noem dit Pyle van Hoop wat ons op hom kan afvuur. Hoekom praat ek oor hoop en nie oor geloof nie? Want Hoop is die eerste bousteen van geloof. Sonder Bybelse Hoop sal ons nie kan glo nie. Om suksesvol te doen, het ons egter nodig om die definisie van Bybelse hoop te verstaan.
John Piper onderskei tussen drie tipes hoop:
Eerstens is Hoop die begeerte na iets goeds in die toekoms. Die kinders kan sê: “Ek hoop dat pappa vanaand vroeg by die huis kom, sodat ons bal na aandete kan speel.” Met ander woorde, hulle wil hê dat hy vroeg by die huis moet kom, sodat hulle hierdie goeie ding kan ervaar, naamlik om na aandete saam te speel.
Tweedens is Hoop is die goeie ding in die toekoms wat ons verlang. Ons kan sê: “Ons hoop dat Jim veilig sal arriveer.” Met ander woorde, Jim se veilige aankoms is die onderwerp van ons hoop.
Derdens is Hoop die rede waarom ons hoop dat iets wel sal gebeur. Ons kan sê: ”n Goeie wind van agter wind is ons enigste hoop om betyds te kom.’ Met ander woorde, die wind is die rede waarom ons die toekomstige goeie wat ons wil bereik, wel kan bereik.
Hoop word dus op drie maniere gebruik:
- Die begeerte na iets goeds in die toekoms,
- die ding in die toekoms wat ons wil hê, en
- die basis of rede om te dink dat ons begeerte inderdaad vervul kan word.
Al drie hierdie gebruike van hoop word in die Bybel gevind. Die belangrikste kenmerk van Bybelse hoop kom egter nie voor in een van hierdie gewone gebruike van die woord hoop nie. Trouens, die betekenis van hoop in die Skrif is byna die teenoorgestelde van die gewone gebruik van die woord ‘hoop’ wat ons ken. Wanneer ons die woord hoop gebruik, spreek ons eerder onsekerheid uit as sekerheid:
- “Ek hoop dat pappa vroeg by die huis kom,” beteken: “Ek het geen sekerheid dat pappa betyds by die huis sal kom nie, ek hoop net dat hy sal.”
- “Ons hoop dat Jim veilig sal arriveer,” beteken: “Ons weet nie of hy gaan of nie, maar dit is ons begeerte.”
- ” ‘n Wind van agter is ons enigste hoop om betyds te kom’ ‘, beteken’ ”n goeie wind sal ons betyds by ons gewenste doel bring, maar ons kan nie seker wees dat ons een sal kry nie.’
Gewoonlik spreek ons onsekerheid uit wanneer ons hoop uitspreek. Dit is nie die Bybelse betekenis van hoop nie en die belangrikste ding wat ek vanoggend wil doen, is om jou uit die Skrif te wys dat Bybelse hoop nie net ‘n begeerte is na iets goeds in die toekoms nie, maar dat Bybelse hoop ‘n vaste vertroue is in die toekoms.
Bybelse hoop begeer nie net iets goeds vir die toekoms nie, Bybelse hoop verwag dat dit sal gebeur. Dit verwag ook nie net dat dit sal gebeur nie – hy is vol vertroue dat dit sal gebeur. Daar is ‘n sekerheid dat die goeie wat ons verwag en verlang, inderdaad gedoen sal word.
Bybelse hoop is nie wiskundige of logiese sekerheid nie
Bybelse hoop verskil van byvoorbeeld wiskundige of logiese sekerheid. Wiskundige of logiese sekerheid spruit uit die noodsaaklikheid van nie-morele wette. As ons twee appels het en nog twee byvoeg, kan ons wiskundig seker wees dat ons nou vier appels het. As alle mense sterflik is en as Piet ‘n mens is, kan ons logies seker wees dat Piet sterflik is. Dit is logiese sekerheid.
Daar is egter ‘n soort sekerheid en vertroue wat nie uit wiskundige berekeninge of bloot logiese wette kom nie. Ons noem dit ‘morele sekerheid’. Ek noem dit moreel omdat dit gewortel is in die toewyding van die wil van persone en die wil is die setel van moraliteit. Wat dus met die wil te doen het, is ‘n kwessie van moraliteit en morele sekerheid is ‘n sekerheid wat gebaseer is op die handelinge van ons wil.
Bybelse hoop is nie net ‘n begeerte dat iets goeds moet gebeur nie. Dit is ‘n selfversekerde verwagting vir iets goeds in die toekoms. Bybelse hoop het morele sekerheid daarin. As ons vir mekaar sê: “Hoop op God!” beteken dit nie, ‘Hou duim vas en hoop op die beste’ nie. Dit beteken, om die woorde van William Carey te gebruik, “Verwag groot dinge van God.”
Slot – Die volle versekering van hoop
Ons lees in
Heb 6:11 Maar ons verlang dat elkeen van julle dieselfde ywer mag toon om te kom tot die volkome sekerheid van die hoop tot die einde toe
Wat beteken “die volkome sekerheid van hoop”? Dit beteken hoop wat volledig verseker is. Hoop wat vol vertroue is. Hoop wat morele sekerheid bevat. Dit is nie duim-vashou hoop nie. Dit is nie die lippe bytende kyk as jy tien sekondes voor die eindfluitjie geblaas word, sien hoe die ander span ’n strafskop pale toe kry nie. Bybelse Hoop is daardie deel van geloof wat op die toekoms fokus. In die Bybel kan ons hoop noem as geloof wat op die toekoms gerig is.
In werklikheid impliseer vers 12 dat hoop en geloof amper dieselfde is. Let op dat waar vers 11 sê, kom tot die volle sekerheid van die hoop; vers 12 sê dat die resultaat van die sekerheid van hoop is dat jy sal wees soos diegene wat deur geloof en geduld die beloftes beërwe. Daarom, sê hy, Jaag die hoop na sodat jy soos die gelowiges van ouds kan wees – selfs wanneer die wêreld rondom jou uitmekaarval, kan jy die volle sekerheid van hoop in ’n goeie God wat ’n hoopvolle toekoms vir jou het, hê.
Daarom wil ek vandag vir jou, in jou omstandighede, sê : Verwag groot dinge van God. Amen.
Rusplekkies op my Geloofspad 
Amen
LikeLike