Ons teksvers vanoggend kom uit Ef 6:10  Eindelik, my broeders, word kragtig in die Here en in die krag van sy sterkte. Paulus begin hier om die gemeente in Efese te leer oor geestelike oorvoering en ons gaan vanoggend vir ‘n oomblik hierby stilstaan. Hy begin heel eerste om die kerk in Efese te vermaan om kragtig te wees in die Here. Ons ken amper almal die sinnetjie wat hierop volg in vers 11:  Trek die volle wapenrusting van God aan, sodat julle staande kan bly teen die liste van die duiwel. Ons mis egter die inleiding, wat die fondasie vorm van die hele lering wat hierop volg. Hoekom begin Paulus deur die gemeente heel eerste te vermaan om sterk te wees in die Here?

Ek glo dat Petrus ‘n gedeelte van die antwoord gee in 1 Pet 5:8  Wees nugter en waaksaam, want julle teëstander, die duiwel, loop rond soos ‘n brullende leeu, en soek wie hy kan verslind. Petrus skrywe nie aan ongelowiges nie. Hy skrywe aan gelowiges. Hy sê dat die duiwel soek na watter gelowiges of Christene hy kan verslind. Om nugter te wees beteken om by jou volle sinne te wees en nie geestelik aan die slaap nie. Om nie geestelik nugter en waaksaam te wees nie, beteken om geestelik swak te wees. Dit is presies die tipe Christen na wie die duiwel op soek is om te verslind. Mens kan finansieël sterk wees, of sielkundig sterk of dalk emosioneel sterk, maar dit is moontlik om nie sterk in die Here te wees nie. Wanneer ons geestelik sterk is, dan kan ons staande bly teen die aanslae van die duiwel.

Die tweede gedeelte van die antwoord, glo ek, vind ons in Ef 2:10  Want ons is sy maaksel, geskape in Christus Jesus tot goeie werke wat God voorberei het, sodat ons daarin kan wandel. Om kragtig te wees in die Here, beteken nie slegs om jouself te kan beskerm nie, dit beteken ook dat jy behoort te wandel in die goeie werke wat God vir jou voorberei het. Wat beteken daardie goeie werke? Dit is om elke dag vir die Here te vra, “Vader, hoe kan ek U koninkryk laat kom vandag?” en dan te volg waar Hy jou heen lei.

Twee areas om in sterk te wees

Tog gebeur dit dat baie gelowiges sukkel om staande te bly in hulle geloof. Hulle verstaan nie waar en hoe hulle geestelik sterk moet wees nie. ‘n Goeie generaal sal oor die hele gevegsarena kyk om te sien waar sy verdediging sterk is en waar dit swak is. Hy sal dit dan opweeg teenoor wat hy weet waar sy vyand ‘n sterk teenwoordigheid handhaaf en waar hulle nie so sterk is nie. Op grond van hierdie inligting sal hy dan die sterkte van sy weermag verdeel om die mees effektief teen sy vyand op te tree. Ek glo dat ons wys sal wees as ons dieselfde doen.

Ken die stem van die Here

Die eerste area waarin ons kragtig in die Here moet wees is om die stem van die Here te herken. In die Tweede Wêreldoorlog was daar radio operateurs in Engeland wat Duits baie goed kon praat. Hulle werk was om die Duitse bomwerpers deurmekaar te maak. In die een bekende geval het ‘n groep Duitse bomwerpers in die mis verdwaal oor die Engelse kanaal. Hulle het toe oor die radio vir rigting gevra. Die Engelse het gemaak asof hulle die Duitse radiobeheer is en verkeerde instruksies gegee aan die bomwerpers. Hierop het die Duitsers op die radio gesê dat die vlieeniers nie na die Engelse moet luister nie en dat hulle lieg. Toe antwoord die Engelse dat hulle die Duitsers is en dat die Duitsers die Engelse is wat lieg. Die arme vlieeniers het later nie meer geweet wie om te glo nie. Sommige bomwerpers het die regte Duitsers se stemme herken en hulle pad na Engeland gevind. Van die ander weer het die Engelse vir die Duisters aangesien en hulle het oor die see gevlieg totdat hulle brandstof opgeraak het en hulle neergestort het.

In ons geestelike lewens is dit baie dieselfde. Daar is baie stemme wat praat en ons deurmekaar maak. Mens weet nie altyd of dit die Here is wat praat, of dit sommer ons eie gedagtes is en of dit die duiwel is nie. Jesus leer ons in Joh 10:27-28  My skape luister na my stem, en Ek ken hulle, en hulle volg My.  (28)  En Ek gee hulle die ewige lewe, en hulle sal nooit verlore gaan tot in ewigheid nie, en niemand sal hulle uit my hand ruk nie.

Ons het nodig om die stem van die Heilige Gees te herken tussen al die ander stemme sodat ons Sy instruksies kan volg.

Ken jou skeppingsdoel

‘n Tweede area waarin ons kragtig in die Here moet wees, is ons skeppingsdoel. Die bekende skrywer Mark Twain word onder andere onthou vir hierdie aanhaling: “There are two great days in a person’s life: the day when he is born and the day he finds out why.” In die Tweede Wêreldoorlog was daar ook ‘n sekere afdeling Duitse soldate wat Amerikaans goed kon praat. Hulle mandaat was om soos die Amerikaanse soldate aan te trek en hulle dan deurmekaar te maak en chaos te saai. Wanneer hulle dus Amerikaanse troepe ontmoet het, het hulle die Amerikaners op verkeerde roetes of na verkeerde bestemmings gestuur. Hulle het ook die padwyser bordjies omgedraai sodat die voertuie met die kos en ammunisie na heeltemal verkeerde dorpe gery het. Op hierdie manier het hulle chaos veroorsaak en ook baie mannekrag en tyd laat vermors. Ek glo dat baie mense kan getuig hoedat daar chaos in hulle lewens ontstaan het sodat hulle vandag vasgevang is in ‘n beroep waarvan hulle nie hou nie of in ‘n leefstyl wat nie deel van hulle skeppingsdoel is nie. Hulle wonder hoe hulle daar beland het en en weet nie hoe hulle dit kan verander nie. Ander weer het al ‘n paar regtig goeie kanse gekry op sukses maar op die een of ander wyse kon hulle nie deurbreek nie.

Wanneer ons weet wat ons mandaat is, wat die rede is hoekom ons gebore is, dan maak ons lewe skielik sin en dan is op pad na ‘n definitiewe bestemming. So ‘n persoon sal dinge of persone wat sy tyd of mannekrag wil mors, gou herken en dit vermy.

Jesus het gesê,  “Ek is die weg en die waarheid en die lewe; niemand kom na die Vader behalwe deur My nie.” (Joh 14:6)

Wanneer ons kragtig in die Here is, dan is kragtig in ons skeppingsdoel en in die lewe. Daarom is dit belangrik dat ons ons identiteit en skeppingsdoel sal ken, definieer en kan uitleef. Eers dan sal ons die mandaat kan uitleef in Ef 2:10  Want ons is sy maaksel, geskape in Christus Jesus tot goeie werke wat God voorberei het, sodat ons daarin kan wandel.

Hoe om kragtig in die Here te word

Hier is drie maniere wat die Skrif ons leer, oor hoe ons in die Here se krag kan intap:

Om God te ken, bring krag

In Daniël 11:32, waar hy praat oor die eindtyd, sê Daniël dat daar ‘n groep mense sal wees wat hul goddelose verbeeldingsvlugte sal volg, maar in hierdie vers gee hy ook die ander kant daarvan. Hy sê, “… maar die mense wat hulle God ken, sal vasstaan..” (ANT)

Een van die maniere om God se krag te gebruik, is om Hom te ken. Wanneer ons Hom ken, sal ons die dinge verkry wat ons nodig het, insluitend krag. Dit gaan terug na Matteus 6:33: “Maar soek eers die koninkryk van God en sy geregtigheid, en al hierdie dinge sal aan julle bygevoeg word.”

As ons eers die Koninkryk van God en Sy geregtigheid soek, sal ons al die ander dinge wat ons nodig het, insluitende krag. Diegene wat hulle God ken, sal sterk wees, en in plaas daarvan om te val, sal hulle groot dade verrig.

Om in die Woord te bly, bring krag

Die apostel Johannes het aan die jongmanne, aan die kinders en die vaders geskryf.  Aan die jongmanne spesifiek het hy gesê: “Ek het vir julle geskrywe, jongmense, omdat julle sterk is en die woord van God in julle bly en julle die Bose oorwin het.”(1 Joh. 2:14).

Tot die mate waarin die Woord in ons bly, sal ons krag hê. Wanneer die Woord aan ons binnekant is en ons daarin woon, mediteer daarop, herkou daaraan en ons gees daarmee voed, sal ons kragtig wees in die mag van die Here. Die tyd om gereed te maak teen siekte is nie wanneer jy siek is nie. Nee, die tyd om sterk teen siektes te wees, is terwyl jy gesond is. Dan is die tyd dat jy gevul moet word met die Woord van God oor genesing.

Die tyd om sterk te word op finansies, is nie wanneer die finansiële stelsels van die wêreld ineenstort nie. Mens moet voor die tyd oor die Woord na dink en oor God se voorsiening van voorspoed in tye van teespoed, in jou gees vasmaak.

Wag op die Here bring krag

Die derde en laaste ding wat ek sien wat krag bring, is uit die woorde van Jesaja. Die profeet Jesaja het gesê dat die wat op die Here wag, kry nuwe krag.

Jes 40:28-31  Weet jy dit nie? Of het jy dit nie gehoor nie? ‘n Ewige God is die HERE, Skepper van die eindes van die aarde; Hy word nie moeg of mat nie; daar is geen deurgronding van sy verstand nie.  (29)  Hy gee die vermoeide krag en vermenigvuldig sterkte vir die wat geen kragte het nie.  (30)  Die jonges word moeg en mat, en die jongmanne struikel selfs;  (31)  maar die wat op die HERE wag, kry nuwe krag; hulle vaar op met vleuels soos die arende; hulle hardloop en word nie moeg nie, hulle wandel en word nie mat nie.

Die woord wag in vers 31 beteken “om te soek, verwag en hoop in God.” Die woord in Hebreeus vir ‘kry nuwe krag’ beteken “ruil”. Jy sal jou swakheid uitruil vir God se krag. Hallelujah!

Ons het elke dag so ‘n goddelike uitruiling van krag nodig. As jy in die môre opstaan ​​en jy die Here soek en in Sy teenwoordigheid wag, dan dien jy die Here. In Sy teenwoordigheid sal diegene wat geen mag het nie, in krag verhoog word. Vir die swakkes sal Hy sy krag gee, en hulle sal met vlerke soos arende opstyg. As jy moeg is om swak te wees, wag op die Here!

Slot

Ons, as kinders van die Here, kan nie die krag van die Here bekend maak aan die wêreld as ons nie self eers sterk geword het in Sy krag nie. As jy graag ‘n verskil wil maak in jou omgewing, maar jou voel moedeloos en gefrustreerd omdat dit lyk asof alles teen jou werk, dan wil ek jou bemoedig uit ons teksvers vir vandag: Eindelik, my broeders, word kragtig in die Here en in die krag van sy sterkte. (Ef 6:10)

One thought on “Wees sterk in die Here

Laat 'n boodskap

Verskaf jou besonderhede hieronder of klik op 'n logo om in te teken:

WordPress.com Logo

Jy lewer kommentaar met jou rekening by WordPress.com. Log Out /  Verander )

Google photo

Jy lewer kommentaar met jou rekening by Google. Log Out /  Verander )

Twitter picture

Jy lewer kommentaar met jou rekening by Twitter. Log Out /  Verander )

Facebook photo

Jy lewer kommentaar met jou rekening by Facebook. Log Out /  Verander )

Connecting to %s

This site uses Akismet to reduce spam. Learn how your comment data is processed.