Tommy Lessing

2016-04-10

Die verhaal word vertel van ‘n man wat vasgekeer was in sy huis toe die rivier in vloed afgekom het. Mense het hom kom waarsku dat hy moet vlug terwyl daar nog tyd is. “Ek is nie bang vir die vloed nie, ek vertrou op die Here.” het hy gesê en in sy huis gebly. Mettertyd het die vloedwater sy huis oorspoel en was hy verplig om op die huis se dak te skuil. Daar het ‘n mense op ‘n boot by hom gekom om hom te red. “Ek is nie bang vir die vloed nie, ek vertrou op die Here.” het hy gesê en op sy huis se dak gebly. Die vloed het erger geword sodat hy later heel op die nok van die huis se dak vasgekeer was. ‘n Helikopter het verbygekom en hulle het ‘n tou afgegooi om hom te red. “Ek is nie bang vir die vloed nie, ek vertrou op die Here.” het hy gesê en op die nok gebly. Toe het die vloed die huis verswelg en die man het verdrink. In die hemel hy vir Jesus gevra hoekom Hy hom nie gered het van die vloed nie. Jesus het geantwoord, ‘Ek het betyds mense gestuur om jou te waarsku sodat jy kon vlug, maar jy wou nie. Toe het ek ‘n boot gestuur en daarna ‘n helikopter om jou te red. Jy wou nie die hulp wat Ek stuur aanvaar nie. Dit het jou lewe gekos.”

 

Wanneer ons die Here om hulp vra, sal Hy dit wel betyds stuur. Dit hang van ons af of ons dit wil aanvaar.

 

Moet jou nie kwel nie

Hakuna Matata is ‘n frase uit Swahili. Dit beteken ‘moenie worry nie’. Die frase het wêreldwyd bekendheid verwerf met die bekendstelling van Walt Disney se film “The Lion King”. Wanneer ek aan hierdie frase dink, moet ek glimlag. ‘Worry’, het ek geleer, is ‘n ding wat ons baie goed kan doen. Met ‘ons’, bedoel ek, ‘die kinders van die Here’. Ons ‘worry’ oor waar more se brood vandaan gaan kom, oor ons oudag, die toekoms van die land, ons kinders, ons finansies, werk, ons gesondheid en ‘n duisend ander dinge. In kort, wanneer dit by ‘worry’ kom, staan die Christene nie ‘n duim terug vir mense van ander gelowe nie.

Luister na wat Jesus hieroor te sê het:

(Mat 6:25-34) Daarom sê Ek vir julle: Moenie julle kwel oor jul lewe—wat julle sal eet en wat julle sal drink nie; of oor jul liggaam—wat julle sal aantrek nie. Is die lewe nie meer as die voedsel en die liggaam as die klere nie? Kyk na die voëls van die hemel; hulle saai nie en hulle maai nie en hulle bring nie bymekaar in skure nie, en tog voed julle hemelse Vader hulle. Is julle nie baie meer werd as hulle nie? Wie tog onder julle kan, deur hom te kwel, een el by sy lengte voeg? En wat kwel julle jul oor klere? Let op die lelies van die veld, hoe hulle groei; hulle arbei nie en hulle spin nie; en Ek sê vir julle dat selfs Salomo in al sy heerlikheid nie bekleed was soos een van hulle nie. As God dan die gras van die veld, wat vandag daar is en môre in ‘n oond gegooi word, so beklee, hoeveel te meer vir julle, kleingelowiges? Daarom moet julle jul nie kwel en sê: Wat sal ons eet, of wat sal ons drink, of wat sal ons aantrek nie? Want na al hierdie dinge soek die heidene; want julle hemelse Vader weet dat julle al hierdie dinge nodig het. Maar soek eers die koninkryk van God en sy geregtigheid, en al hierdie dinge sal vir julle bygevoeg word. Kwel julle dus nie oor môre nie, want môre sal hom oor sy eie dinge kwel. Elke dag het genoeg aan sy eie kwaad.

 

Die mense in die Bybelse tye het hulleself bekommer oor presies dieselfde dinge as wat mense hulle vandag bekommer. Jesus het hierdie woorde vir hulle gespreek om hulle te bemoedig. Dit is nog net so van toepassing op ons vandag. As jy ‘n goeie naslaan Bybel het, mag jy dalk verwys word na Fil 4:6

Wees oor niks besorg nie, maar laat julle begeertes in alles deur gebed en smeking met danksegging bekend word by God.

“Wees oor niks besorg nie” is die Grieks vir “Hakuna Matata”.

Hakuna Matata en Que Sera

Doris Day het ‘n groot treffer gehad met die lied ‘Que Sera’. Dit beteken ‘Whatever will be, will be’. Daar is ‘n Afrikaanse spreekwoord wat lui, ‘om Gods water oor Gods akker te laat loop’. Dit is in essensie wat ‘Que Sera’ beteken. Die filosofie daaragter is een van aanvaarding van wat gebeur want jy kan dit in elk geval nie beheer nie. Dit is nie wat die Bybel bedoel nie.

“Wees oor niks besorg nie” beteken nie om net onverantwoordelik op te hou om om te gee nie. Nee, dan word ons soos die man wat deur die vloed vasgekeer was. Dit beteken bloot om jou probleem te oorhandig aan Iemand wat dit beter as jy, namens jou kan hanteer.

‘n Voorbeeld hiervan is wanneer jy ‘n prokureur benodig vir ‘n hofsaak. Vir jou mag dit dalk baie erg lyk en jy bekommer jou dalk siek oor die saak. Vir die prokureur, wat kundig in die dinge van die wet is en meer kennis daaroor het as jy, is dit weer ‘n maklike ding om jou uit die situasie te red. Wanneer jy ‘n prokureur gaan sien, dan neem hy beheer van die saak uit jou hande. Hy adviseer jou wat om te doen en wat om nie te doen en tree in jou beste belang op.

Dit bring ons by die kern van die saak:

1 Petrus 5:7 leer ons: Werp al julle bekommernis op Hom, want Hy sorg vir julle.

Die Amplified Bible lees:

Casting the whole of your care [all your anxieties, all your worries, all your concerns, once and for all] on Him, for He cares for you affectionately and cares about you  watchfully.

Wanneer daar ‘n probleem opduik wat te veel raak vir jou, dan stel ek voor dat jy jou Hemelse Prokureur gaan sien. “Werp al julle bekommernis op Hom” beteken om die beheer van die saak aan Hom te oorhandig.  Wanneer ons dit doen, sal Hy in ons beste belang optree. Net soos met ‘n prokureur, moet ons dan slegs doen wat Hy vir ons vra en Hom vertrou om ons te help. Die belofte hierop is God se bemoediging aan ‘n bekommerde pappa of mamma of enkelouer: “want Hy sorg vir julle.” Gewoonlik voel mens sommer beter na die tyd. Mens slaap beter en mens voel nie meer so bekommerd nie. Dit is dieselfde wanneer ons, ons probleme aan Jesus oorhandig.

God wil jou help

Die probleem wat baie Christene het, is dat hulle glo dat God kan, maar hulle is nie altyd so seker dat God wil nie. Hier is egter drie opdragte in die Bybel oor ‘worry’, opdragte wat duidelik uitspel dat God jou wil help. God sê vandag vir jou dat jy moet ophou om jou so te bekommer en dat jy op Hom moet vertrou. Hy sal vir jou sorg.

Al wat jy moet doen, is om met afwagting en aktief na die uitkoms te soek en te reageer wanneer [nie ‘as’ nie] die hulp kom.

Laat 'n boodskap

Verskaf jou besonderhede hieronder of klik op 'n logo om in te teken:

WordPress.com Logo

Jy lewer kommentaar met jou rekening by WordPress.com. Log Out /  Verander )

Google photo

Jy lewer kommentaar met jou rekening by Google. Log Out /  Verander )

Twitter picture

Jy lewer kommentaar met jou rekening by Twitter. Log Out /  Verander )

Facebook photo

Jy lewer kommentaar met jou rekening by Facebook. Log Out /  Verander )

Connecting to %s

This site uses Akismet to reduce spam. Learn how your comment data is processed.